Comezo

PostHeaderIcon Roteiro Nocturno

Este sábado 13 DE AGOSTO saímos de andaina de novo polo monte da parroquia, pero desta volta farémolo de noite. Aproveitando a lúa chea de agosto, realizaremos a camiñada arredor da aldea de Donón que tivemos que suspender en xullo polo mal tempo. Sairemos da Caracola ás 23:00h para baixar pola aldea de Donón cara ao areeiro e chegaremos ao extremo oeste da praia de Barra para comezar dende aí a subida cara a Subrido e Melide. Faremos unha paradiña en punta Robaleira para descansar un chisco e contemplar as marabillosas vistas nocturnas da praia de Melide, a ría e a costa da Soavela. Despois volveremos pola pista cara a Donón.

Recoméndase levar calzado axeitado para camiñar e algunha roupa de abrigo, pero tampouco en exceso se a noite non está moi fría. Os menores de 16 anos que queiran asistir, deberán facelo acompañados dun adulto. Non é preciso levar lanternas nin chalecos reflectantes, pois nos encargaremos de sinalar a comitiva nos tramos en que vaiamos por zonas de posible tránsito de vehículos.


 

PostHeaderIcon Máis de 70 persoas no roteiro polos montes do Hío

Aínda non eran as 10 da mañá do pasado domingo 19 de xuño e xa máis de 50 persoas agardaban o comezo da andaina polo Monte Veciñal do Hío, derradeiro dos 3 roteiros organizados conxuntamente polas comunidades de montes veciñais en man común do Hío, Darbo e Coiro e a Xestora Veciñal dos Montes de Aldán. Pouco despois, coa chegada dos menos madrugadores botamos a andar dende a Cruz do Castro camiño da Fontenova para despois subir pola calzada romana até A Fanica, onde a Brigada da nosa comunidade limpou recentemente a zona repoboada hai varios anos coa colaboración dos rapaces do CEIP do Hío, que levaba anos descoidada. 

Despois cruzamos a estrada a Donón para nos dirixir á aldea de Viñó e ao areeiro onde falamos un chisco dos problemas ambientais que afectan o fráxil ecosistema dunar, despois de coller folgos na fonte de Viñó. Saímos do areeiro camiño xa a Nerga onde chegamos ás 12:15 da mañá, despois de parar no Pedroallo a ollar as brañas que utiliza o xabarín para se bañar.

Un percorrido que se lles fixo curto aos camiños máis avezados malia a dureza das dúas subidas realizadas, -nos apenas 6 km de camiñada acumulamos case 700 m de desniveis-, e que agradeceron os menos experimentados e que serviu en definitiva de colofón das rutas feitas polos montes comunais do concello de Cangas, unha inmensa riqueza económica e ambiental que cómpre defendermos entre todas e todos.

As fotografías que acompañan esta nota foron cedidas por Estanislao Sotelo.



 

PostHeaderIcon Domingo 19 de xuño, roteiro polo monte do Hío

Despois de pasar polos montes de Darbo e Coiro, as camiñadas organizadas polas Comunidades de Montes Veciñais en Man Común de Cangas e a Xestora dos Montes Veciñais de Aldán chegan ao Hío.

O vindeiro domingo 19 de xuño, sairemos desde A Cruz do Castro ás 10 da mañá para percorrer uns sete quilómetros polos montes do Hío nun roteiro circular que nos levará polos montes veciñais da parroquia. Recoméndase levar calzado axeitado para unha andaina na que pasaremos por zonas húmidas á beira dos regos e tamén camiñaremos un pouco por area, aínda que a maior parte do camiño será sobre terra. O tempo aproximado do roteiro será dunhas dúas horas.


 

PostHeaderIcon Roteiros polos montes veciñais do concello de Cangas

ROTEIROS POLOS MONTES COMUNAIS DE CANGAS

DOMINGO 5 de XUÑO 2011
Roteiro polo MONTE COMUNAL DE DARBO
Saída ás 10:00h desde o BALCÓN DO REI
Percorrido: 8 km (2 horas)
DOMINGO 12 de XUÑO 2011
Roteiro polo MONTE COMUNAL DE COIRO
Saída ás 10:00h desde o IGREXARIO DE COIRO
DOMINGO 19 de XUÑO 2011
Roteiro polo MONTE COMUNAL DO HÍO
Saída ás 10:00h, desde a CRUZ DO CASTRO


As tres Comunidades de Montes Veciñais en Man Común do Concello de Cangas (C.M.V.M.C. de Darbo, Coiro e O Hío) e a Xestora Veciñal dos Montes de Aldán organizan de xeito conxunto un ciclo de andainas nas que dar a coñecer a todos os veciños que así o desexen, a riqueza paisaxística, biolóxica e patrimonial que acollen os nosos montes.

Xa que este ano 2011, é o ANO INTERNACIONAL DOS BOSQUES (2011-International Year Forests) e co gallo da celebración anual do DÍA MUNDIAL DO MEDIO AMBIENTE, este vindeiro domingo día 5 de xuño da comezo un ciclo de andainas que ao longo dos próximos tres domingos do mes de xuño percorrerá as comunidades de montes de Cangas.


ROTEIROS POLOS MONTES COMUNAIS DE CANGAS

Organizan: Comunidades de Montes Veciñais en Man Común do Concello de Cangas (C.M.V.M.C. das parroquias de Darbo, Coiro e O Hío)


DOMINGO 5 de XUÑO
Roteiro polo MONTE COMUNAL DE DARBO
Saída ás 10:00h desde o BALCÓN DO REI
Percorrido: 8 km (2 horas)


DOMINGO 12 de XUÑO
Roteiro polo MONTE COMUNAL DE COIRO
Saída ás 10:00h desde o IGREXARIO DE COIRO

DOMINGO 19 de XUÑO
Roteiro polo MONTE COMUNAL DO HÍO
Saída ás 10:00h, lugar por determinar
 

PostHeaderIcon Reforestación co alumnado do CEIP do Hío

O pasado 12 de abril, a comunidade de montes procedeu á primeira fase da reforestación da Chan de Varalonga coa plantación de 100 exemplares de sobreira. Para isto contamos coa colaboración do colexio público da parroquia, concretamente cos rapaces e rapazas do terceiro ciclo de Primaria, que acompañados das súas mestras gozaron dunha mañá de traballo no monte. Porén, a intención da CMVMC do Hío é a de levar o vínculo da mocidade da parroquia co monte comunal máis alá de actuacións puntuais e para iso imos proceder á etiquetaxe das árbores co nome d@s seus/súas plantador@s, etiquetaxe que lles daremos aos cativos, coa intención de implicalos directamente no coidado e protección do monte comunal.



 

PostHeaderIcon Asemblea Xeral Ordinaria

 

A Xunta Directiva da Comunidade de Montes do Hío COMUNICA a todos os comuneiros e comuneiras da parroquia que o vindeiro SÁBADO DÍA 6 DE FEBREIRO, ás 15:00h en primeira convocatoria e ás 17:00 h en SEGUNDA convocatoria, celebrarase unha ASEMBLEA ORDINARIA na ESCOLA VELLA do Hío coa seguinte orde do día:

 

  1. Lectura e aprobación, se procede, da acta anterior.

  2. Estado de contas.

  3. Altas e baixas de comuneiros/as.

  4. Altas e baixas na Xunta Directiva.

  5. Informe de xestións.

  6. Orzamento para o ano 2010.

  7. Propostas presentadas á Comunidade.

  8. Rolda de intervencións.

 

Lembrámoslles aos comuneiros e comuneiras que se queren delegar o seu voto por non poder asistir a dita asemblea por calquera motivo poden solicitar o impreso para a DELEGACIÓN DE VOTO chamando ao número 657 364587, (Lino). O impreso tamén se pode solicitar no enderezo de correo electrónico Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo ou recoller nos seguintes establecementos: bar STOP do Igrexario, bar A Curva de Nerga, bar As Lagoas de Vilariño, bar Cabo Home de Donón, bar O Camiño Vello de Pinténs, bar Areabrava de Vilanova ou Carpintaría O Freixo de Liméns.

 

PostHeaderIcon Comezamos o deslinde do monte comunal

En xuño de 2009 comezamos o labor de deslinde do noso monte comunal, coa resinalización dos máis de 700 puntos que aparecen documentados na Acta de Apeo. O traballo encertouse polo Cabo da Raposa, finalizada ao longo do verán e continúa neste outono pola parcela de Castro-Coruxo.


Estas marcas sinalan o deslinde do monte.